ԱՄՆ-ն չի շտապում բանակցել Թեհրանի հետ․ Դոնալդ Թրամփ

ԱՄՆ նախագահ Դոնալդ Թրամփը հայտարարել է, որ Թեհրանը ցանկանում է բանակցություններ սկսել Միացյալ Նահանգների հետ, սակայն ինքը չի շտապում դա անել։

«Նրանք կցանկանային բանակցել։ Ես չեմ շտապում բանակցություններ անցկացնել, քանի որ մենք ոչնչացրել ենք նրանց  միջուկային օբյեկտը»,- նշել է նա՝ անդրադառնալով հունիսին Իրանի միջուկային օբյեկտներին ԱՄՆ-ի հասցրած հարվածներին։

Թրամփի խոսքով՝ Իրանը պետք է ամեն ինչ սկսի նորից։ Ըստ նրա՝ ավերածություններն այնպիսին են, որ այդ օբյեկտն այլևս հնարավոր չէ օգտագործել։

Միևնույն ժամանակ ԱՄՆ նախագահը չի մանրամասնել, թե Իրանի Իսլամական Հանրապետության որ օբյեկտի մասին է խոսքը։ Ամենայն հավանականությամբ, նա նկատի է ունեցել Ֆորդոյի միջուկային օբյեկտը։