Ալեն Սիմոնյանը ՀՀ քարտեզ է հրապարակել, ապա փոխել այն՝ տեղադրելով այնպիսին, որում «անկլավները» Ադրբեջանի տարածք են

ՀՀ ոչ մի տարածք, ոչ մի բնակավայր, ոչ մի գյուղ, ոչ մի մետր չի կարող հանձնվել, ոչ էլ նման քննարկում կա։ Այս մասին թելեգրամյան իր էջում գրել է ԱԺ նախագահ Ալեն Սիմոնյանը՝ կից հրապարակելով Հայաստանի տարածքն արտացոլող քարտեզ, սակայն րոպեներ անց խմբագրել է գրառումը՝ մեկ այլ քարտեզ տեղադրել, որում, ի տարբերություն նախորդի, որպես ադրբեջանական են ուրվագծված Տավուշի և Արարատի մարզերում գտնվող և անկլավային համարվող բնակավայրերը։

«Գնալ, մտնել սահմանամերձ գյուղեր և կրքեր հրահրել՝ նենգափոխելով իրականությունը, ասածները, մարդկանց հույզերի վրա խաղալը ամենավերջին որակների վառ ապացույց է:

Նման բաները չեն կարող քաղաքական դիվիդենտներ բերել ոչ մեկին:

Հայաստանի Հանրապետությունն ունի հստակ քարտեզ: Այդ քարտեզով ենք մենք անկախացել և դա քննարկման ենթակա չէ»:

Ուսումնասիրելով, սակայն, Ալեն Սիմոնյանի գրառման արձագանքերը, խիստ ուշագրավ պատկեր է ստացվում:

Հայաստանի ԱԺ նախագահը, ըստ ամենայնի, նախ հրապարակում է բրիտանական հանրագիտարանում 1998 թվականին հրապարակված քարտեզ՝ անգլալեզու:

Հրապարակումից հետո ադրբեջանական տելեգրամյան ալիքները Ալեն Սիմոնյանին «հուշում են», որ սխալ քարտեզ է հրապարակել և ճիշտ կանի՝ փոխի: Րոպեներ հետո, արդեն, Հայաստանի ԱԺ նախագահը իրոք փոխում է իր հրապարակած քարտեզը և փոխարենը նոր քարտեզի լուսանկար է հրապարակում (ՄԱԿ-ի 2013 թվականի), որտեղ արդեն Տիգրանաշենը ադրբեջանական անվանումով է:

Կատարվածից հարցեր են առաջանում․ ադրբեջանցիներն տեղյա՞կ էին որ Ալեն Սիմոնյանը պետք է «ՀՀ հստակ քարտեզ» հրապարակեր, արդյո՞ք իրենց «հուշումով» փոխեց «հստակ» քարտեզը 2013թ․-ի քարտեզով, ո՞վ է որոշել (որոշում), թե ինչ քարտեզ հրապարակի Ալեն Սիմոնյանը: Կամ էլ, գուցե, նրանք էլ ուղարկում են իրենց հուշած քարտեզը: Գուցե ԱԱԾ զբաղվելու՞ հարց է։