Ամերիկացի սենատորները Ջո Բայդենին առաջարկել են Ռուսաստանին զսպելու ռազմավարություն

Ամերիկացի սենատորները Ջո Բայդենին առաջարկել են Ռուսաստանին զսպելու ռազմավարություն։ Տեղեկությունը տարածում են ուկրաինական լրատվամիջոցները՝ հղում անելով The Washington Post-ին։

Ըստ դրանց՝ սենատորներ Ջին Շահինը և Ռոբ Փորթմանը նախագահ Ջո Բայդենին առաջարկել են չորս կետից բաղկացած ռազմավարություն, որը նախատեսում է ինչպես դիվանագիտական, այնպես էլ տնտեսական ու ռազմական միջոցներ։

Առաջարկվող ռազմավարության համաձայն՝ ԱՄՆ-ը պետք է մեծացնի Ուկրաինային սպառազինության մատակարարումների ծավալը և  տրամադրի հակաօդային, հակատանկային և հականավային համալիրներ, ինչպես նաև ռադիոէլեկտրոնային պատերազմ վարելու միջոցներ։ Միացյալ Նահանգները նաև պետք է պահանջի դուրս բերել ռուսական զորքերը, որոնք տեղակայված են ուկրաինական սահմանի երկայնքով, մինչև ապագա բանակցությունները։

ԱՄՆ սենատորների ռազմավարության համաձայն՝ ԱՄՆ-ը պետք է աշխատի Գերմանիայի կառավարության հետ՝ կանխելու համար «Հյուսիսային հոսք-2» գազատարի՝ շահագործման հանձնելը, և գործընկերների հետ միջազգային կոալիցիա ձևավորի։