Ամերիկացի սենատորները պահանջում են կոշտ պատասխան տալ Մոսկվային

Ամերիկացի սենատորներ Չակ Շումերը եւ Ջոն Մակքեյնը կոչ են անում ԱՄՆ իշխանություններին` կոշտ պատասխան տալ Ռուսաստանին ԿՀՎ նախկին գործակալ Էդվարդ Սնոուդենին չարտահանձնելու համար:

«Նրանք պետք է պատասխան տան իրենց գործողությունների համար դիվանագիտական, տնտեսական կամ աշխարհաքաղաքական առումներով: Նրանք մշտապես փորձում են մեր աչքը հանել»,- հայտարարել է Շումերը:

Նա նաեւ համարում է, որ ԱՄՆ-ը պետք է դիտարկի Էկվադորի նկատմամբ պատժամիջոցներ կիրառելու հնարավորությունը, որպեսզի այդ երկիրը ապաստան չտրամադրի Սնոուդենին. գրում է The Hill-ը:

Իսկ ըստ Ջոն Մակքեյնի` Սնոուդենին չարտահանձնելը ուղղակի ապտակ է ԱՄՆ-ին: «Հարկավոր չէ վերադառնալ սառը պատերազմի տարիներին, սակայն Ռուսաստանի հետ պետք է գործ ունենալ իրատեսական դիրքերից»,- ասել է նա: