Քաթարի, Թուրքիայի և ԱՄԷ-ի փորձագետները զբաղված են Քաբուլի օդանավակայանի վերականգնմամբ

«Թալիբան» շարժման ներկայացուցիչ Զաբիուլլահ Մուջահիդը հայտնել է, որ մի քանի տեխնիկական թիմեր աշխատում են Քաբուլի օդանավակայանի վերագործարկման ուղղությամբ. հաղորդում է Tolo News-ը:

«Քաթարի, Թուրքիայի և ԱՄԷ-ի տեխնիկական թիմերն աշխատում են Քաբուլի օդանավակայանում աշխատանքները վերսկսելու ուղղությամբ»,- ասել է Մուջահիդը:

Նախորդ օրը Քաբուլի օդանավակայանը մասամբ վերսկսել է աշխատանքը ներքին չվերթերի ուղղությամբ:

Անցյալ շաբաթ Քաթարի հատուկ բանագնաց Մութլաք իբն Մաջիդ ալ Քահթանին հույս էր հայտնել, որ մարդասիրական միջանցքներ կբացվեն՝ Աֆղանստանին օդային օգնություն հասցնելու համար:

Քաթարն ու Թուրքիան վերջին օրերին սերտորեն համագործակցել են «Թալիբան» շարժման հետ՝ Քաբուլի օդանավակայանը հնարավորինս շուտ բացելու համար:

Նշվում է, որ Թուրքիան սեպտեմբերի 1-ից սկսել է ապահովել օդանավակայանի անվտանգությունը՝ այնտեղ տեղակայելով զորակազմ։