Էրդողանը հայտնել է Քաբուլի օդանավակայանի վերաբերյալ որոշումների մասին

Քաբուլում Համիդ Քարզայի միջազգային օդանավակայանի ղեկավարման հարցը քննարկվել է ԱՄՆ-ի ու ՆԱՏՕ-ի հետ: Այս մասին Թուրքիայի հարավ-արևելքում գտնվող Դիարբեքիր քաղաքում ուրբաթօրյա աղոթքից հետո լրագրողների հետ հարցազրույցում հայտնել է Թուրքիայի նախագահ Ռեջեփ Թայիփ Էրդողանը: 

«Մենք քննարկել ենք Թուրքիայի առաքելության շրջանակը. ինչն է ընդունելի Անկարայի համար, և ինչը` անընդունելի: Որոշումներն ընդունվել են»,- ասել է Թուրքիայի ղեկավարը:

Էրդողանը նշել է, որ ՆԱՏՕ-ի գագաթնաժողովի ընթացքում Բայդենի հետ հանդիպման ժամանակ ինքը քննարկել է նաև Աֆղանստանի թեման և հավաստիացրել, որ այս հարցում «ամենաիդեալական քայլը» կձեռնարկվի:

Հիշեցնենք, որ, մայիսից սկսած, Աֆղանստանից ԱՄՆ-ՆԱՏՕ ուժերի դուրսբերումից հետո Թուրքիային առաջարկվել է զորք մտցնել այդ երկիր՝ պաշտպանելու մայրաքաղաքի օդանավակայանի անվտանգությունը։