Պեկինը դեմ է ԱՄՆ-ի՝ Իրանի դեմ միակողմանի պատժամիջոցներին. Չինաստանի ԱԳՆ խոսնակ

Ամառային արձակուրդների նախօրեին լրագրողների հետ հանդիպման ժամանակ Չինաստանի ԱԳ նախարարության պաշտոնական ներկայացուցիչ Հուա Չոն Իինգը կրկին պաշտպանել է Միջուկային համապարփակ համաձայնագիրն ու դատապարտել է ԱՄՆ-ի՝ Իրանի դեմ միակողմանի պատժամիջոցները. հայտնում է ԻՌՆԱ-ն:

«Միջուկային գործարքը բազմակողմանի համաձայնագիր է, որը հաստատվել է ՄԱԿ-ի Անվտանգության խորհրդի կողմից եւ կարևորագույն նշանակություն ունի միջուկային զենքերի չտարածման եւ Մերձավոր Արեւելքում խաղաղության ու կայունության մեխանիզմի պահպանման համար եւ պետք է իրականացվի լիարժեք ու արդյունավետ»,- ասել է Չինաստանի ԱԳՆ մամուլի խոսնակը:

Նա անդրադարձել է նաեւ Իրանի դեմ սահմանված` ԱՄՆ-ի միակողմանի պատժամիջոցներին՝ ընդգծելով. «Չինաստանը մշտապես դեմ է արտահայտվել միակողմանի, միջամտողական բնույթի պատժամիջոցներին, եւ Միջուկային գործարքի մյուս կողմերի հետ միանշանակ պաշտպանում է համաձայնագիրը պահպանելու եւ կիրառելու իր օրինական իրավունքը»: