Իրանն ու Չինաստանը կշարունակեն իրենց օրինական համագործակցությունը. Չինաստանի ԱԳՆ խոսնակ

Իրանն ու Չինաստանը կշարունակեն իրենց օրինական համագործակցությունը. ըստ ԻՌՆԱ-ի` հայտարարել է Չինաստանի ԱԳՆ պաշտոնական ներկայացուցիչ Գենգ Շուանգը` մեկնաբանելով Իրանի խորհրդարանի նախագահ Ալի Լարիջանիի և նրա գլխավորած պատվիրակության եռօրյա այցը Չինաստան:

«Միջազգային օրենքների շրջանակում երկու երկրները շարունակում են իրենց բնականոն համագործակցությունը: Դա պետք է ընդունի և հարգի միջազգային հանրությունը»,- ասել է չինացի դիվանագետը:

Անդրադառնալով հատկապես էներգետիկ ոլորտում երկու երկրների համագործակցությանը և Իրանի դեմ սահմանված ամերիկյան միակողմանի պատժամիջոցներին` Շուանգն ասել է. «ԱՄՆ-ի գործադրած բոլոր ճնշումներով հանդերձ` Չինաստանի դիրքորոշումը հստակ և անփոփոխ է: Մենք շեշտել և շեշտում ենք` դեմ ենք ԱՄՆ-ի միակողմանի և անարդար պատժամիջոցներին»: