ԱՄՆ-ն Թուրքիայից պահանջել է դադարեցնել հորատման աշխատանքները Կիպրոսում

ԱՄՆ-ն իր անհանգստությունն է հայտնել Թուրքիայի կողմից Կիպրոս կղզու շրջակայքում հորատման աշխատանքների կապակցությամբ և պահանջել դադարեցնել դրանք. հաղորդում է gazeteduvar.com.tr կայքը:

Թուրքիայի ԱԳՆ ղեկավար Մևլութ Չավուշօղլուն շաբաթ օրը հայտարարել էր, որ թուրքական հորատող և հետազոտող նավերը Հյուսիսային Կիպրոսի թուրքական հանրապետությունից թույլտվություն են ստացել աշխատանքներ սկսելու վերաբերյալ:

ԱՄՆ պետքարտուղարության խոսնակ Մորգան Օրթագուսն այս կապակցությամբ հայտարարություն է տարածել. «ԱՄՆ-ն իր խորին անհանգստությունն է հայտնում Կիպրոսի Հանրապետության տնտեսական գոտում Թուրքիայի հայտարարած օֆշորային հորատման աշխատանքների կապակցությամբ: Կոչ ենք անում թուրք պաշտոնյաներին` վերջ տալ նմանատիպ գործողություններին, և կողմերին` զսպվածություն ցուցաբերել: Սա բավական սադրիչ քայլ է և տարածաշրջանում իրավիճակը լարելու վտանգ է պարունակում»: