Սաուդյան արքայազնի շրջապատից մարդիկ կապ ունեն Խաշուկջիի սպանության հետ. Էրդողան

Համաձայն ձայնագրությունների` Սաուդյան Արաբիայի թագաժառանգ արքայազն Մուհամեդ բեն Սալմանի մտերիմ շրջապատից մարդիկ կապ ունեն սաուդցի ընդդիմադիր լրագրող Ջամալ Խաշուկջիի սպանության հետ: Այդ մասին հայտարարել է Թուրքիայի նախագահ Ռեջեփ Թայիփ Էրդողանը. հայտնում է РИА Новости-ն: Ըստ նրա` այդ սպանությունը չի կարելի արհամարհել:

Էրդողանը նշել է, որ իսլամական աշխարհում որոշ երկրներ դարձել են դոլարի և ռիալի զոհերը, այդ պատճառով հանդես չեն եկել արդարության կողմից: «Եվրոպայում նույնպես շատերը չեն ցանկանում ճշմարտությունն ասել… Սակայն արդարությունը կհաստատվի: Մենք սպանության մասին տեղեկություններ ենք ներկայացրել Մեծ Բրիտանիային, Ֆրանսիային և ԱՄՆ-ին և պատրաստ ենք տրամադրել նրանց, ովքեր կցանկանան»,- ասել է նա: