Թուրքիայի ամենահարուստ մարդկանցից մեկի մահը հայկական կալվածքների մասին խոսելու առիթ է դարձել

Օրեր առաջ Թուրքիայում սրտի կաթվածից մահացել է երկրի ամենահարուստ մարդկանցից մեկը՝ գործարար  Մուսթաֆա Քոչը: Նրա մահից հետո թուրքական մամուլը սկսել է արծարծել  հայերի՝ թուրքերի կողմից բռնագրավված ունեցվածքի հարցը. տեղեկացնում է «Արևելք»-ը:

Մամուլը նշում է, որ Թուրքիայի ամենահարուստ մարդկանցից մեկը՝ «Koç Holding»ի տերը, որ հունվար 21-ին կնքել է իր մահկանացուն, հարստացել է հայերի ունեցվածքի հաշվին:

Մուստաթա Քոչը համարվում էր շինարարության, սննդամթերքի արտադրության, ինժեներության բնագավառներում միլիարդատերերից մեկը: Թուրքական որոշ թերթեր նշում են, որ նրա  ընտանիքը սկսել է հարստանալ 1920-ին, երբ նրա պապը՝ Վեհպի Քոչը, ով այդ տարիներին ընդամենը բանվոր է եղել, տիրացել է հայերի կալվածքներին և ունեցվածքին և այդպես հարստացել:  

Թուրքական մամուլի այս նշումը քննարկումների առիթ է դարձել երկրում: Ոմանք  սրբապղծություն են համարում երկրի ամենանշանավոր մարդկանցից մեկի մասին նրա մահից հետո նման լուրերի հրապարակումը, իսկ շատերն էլ հակված են ճշմարտությունն իմանալուն և իրերն իրենց անուններով կոչելուն: