Նազարյանն ու Զախարյանը հրաժարվել են ներկա գտնվել ՀԷՑ-ի վերաբերյալ քննարկմանը

Այսօր «Գործընկերություն հանուն բաց հասարակության» կազմակերպությունը կազմակերպել էր հանրային քննարկում` «Ի՞նչ հարցերի պետք է պատասխանի «Հայաստանի էլեկտրական ցանցեր» ՓԲԸ-ում իրականացվելիք աուդիտը. ներկա իրավիճակը» թեմայով:

Ի թիվս այլոց, քննարկմանը ներկա գտնվելու հրավեր էին ստացել ՀՀ վարչապետի աշխատակազմի ղեկավար-նախարար Դավիթ Հարությունյանը, ՀՀ հանրային ծառայությունները կարգավորող հանձնաժողովի նախագահ Ռոբերտ Նազարյանը, ՀՀ էներգետիկայի և բնական պաշարների նախարար Երվանդ Զախարյանը, ովքեր տարբեր պատճառներով մերժել էին քննարկմանը ներկա գտնվելու հրավերը:

«Գործընկերություն հանուն բաց հասարակության» ներկայացուցիչ Դավիթ Ամիրյանը, մինչ քննարկման բուն նյութին անցնելը, հայտարարեց, որ Դավիթ Հարությունյանը մերժել է հրավերը, ասել է, թե շատ զբաղված է սահմանադրական բարեփոխումների շուրջ աշխատանքներով:

ՀԾԿՀ-ից իրենց ներկա չգտնվելու փաստը պատճառաբանել են նրանով, որ մյուս` իրենց հետաքրքրող բանախոսները ներկա չեն: Երվանդ Զախարյանն էլ առանց որևէ պատճառաբանության հրաժարվել է ներկա գտնվել քննարկմանը: