ԱԺ-ն կողմ քվեարկեց գազի հարցով հանձնաժողով ստեղծելու նախագծին

Այսօր Ազգային ժողովը կողմ քվեարկեց խորհրդարանում գազի հարցով ժամանակավոր հանձնաժողով ստեղծելու նախագծին: Կողմ քվեարկեց 75 պատգամավոր, դեմ՝ 3, ձեռնպահ՝ 30:

ՀԱԿ խմբակցության պատգամավոր Լևոն Զուրաբյանը քվեարկությունից առաջ նշեց, որ ընդունում են` ստեղծված է մի գործիք, որը հնարավորություն կտա հայտնաբերելու գազի հետ կապված խնդիրները, նաեւ հայտնեց, որ իրենք կողմ են քվեարկելու նախագծին և մասնակցելու են հանձնաժողովի աշխատանքներին:

ԲՀԿ խմբակցության քարտուղար Նաիրա Զոհրաբյանը հայտնեց, որ խմբակցությունը ձեռնպահ կքվեարկի նախագծին:

Հիշեցնենք, որ նախորդ քառօրյայի ընթացքում Հանրապետական մեծամասնությունը դեմ քվեարկեց գազի ժամանակավոր հանձնաժողով ստեղծելու վերաբերյալ ԱԺ 4 ոչ իշխանական ուժերի նախագծին, որից հետո ՀՀ Ազգային ժողովի նախագահ Հովիկ Աբրահամյանը փետրվարի 17-ին խմբակցությունների ղեկավարներին խորհրդակցության հրավիրեց: Խորհրդակցության ժամանակ ԱԺ նախագահը խմբակցությունների ղեկավարներին ներկայացրեց ՀՀԿ խմբակցության առաջարկը՝ խորհրդարանում գազի հանձնաժողով ստեղծել: