Հայաստանի պատմամշակութային ժառանգությունը` միջազգային ցուցահանդեսում

Սույն թվականի հոկտեմբերի 17-19-ը Հայաստանի ազգային մրցունակության հիմնադրամը հայկական 8 զբոսաշրջային ընկերությունների հետ համատեղ կներկայացնի Հայաստանը Իտալիայի Ռիմինի քաղաքում կայանալիք TTG INCONTRI զբոսաշրջային միջազգային ցուցահանդեսում. հայտնում են Հայաստանի ազգային մրցունակության հիմնադրամի հանրային կապերի գրասենյակից:

Այս տարի ցուցահանդեսին կմասնակցեն շուրջ 130 երկրներից ավելի քան 2400 զբոսաշրջային ընկերություններ և 50 հազար զբոսաշրջային ոլորտի մասնագետներ:

Ցուցահանդեսի ընթացքում միջազգային հանրությանը կներկայացվեն Հայաստանի պատմամշակութային և քրիստոնեական հարուստ ժառանգությունը ցուցադրող գովազդային նյութեր և քարտեզներ իտալերենով:

Իտալական շուկան Հայաստանի ազգային մրցունակության հիմնադրամի զբոսաշրջության խթանման թիրախային ուղղություններից է, որի զարգացման համար ներդրված ջանքերն էական առաջընթաց են խոստանում: