Իրաքում առաջին ընտրություններն են ամերիկյան զորքերի դուրսբերումից հետո

Այսօր` ապրիլի 20-ին, Իրաքի 12 գավառներում ընտրում են օրենսդիր ժողովների անդամներին: Սրանք ամերիկյան զորքերի դուրսբերումից հետո առաջին ընտրություններն են երկրում. տեղեկացնում է РБК-ն:

Քվեարկությանը կարող են մասնակցել 13,8 մլն իրաքցիներ: Տարածքային օրենսդիր մարմիններում տեղ ունենալու համար պայքար են մղում 8 հազար թեկնածուներ:

Չնայած ընտրություններին մասնակցում են մինչեւ 50 քաղաքական խմբեր ու միություններ` հիմնական պայքարն ընթանալու է շիաների եւ  վարչապետ Նուրի ալ Մալիքիի «Իրավական պետություն» կոալիցիայի ու սուննի «Իրաքիա բլոկ» ընդդիմության միջեւ:

Իրաքի Սահմանադրությամբ` տեղական օրենսդիր մարմինները կարող են հայտարարել հանրաքվեի մասին եւ դաշնային տարածաշրջան ստեղծել` մեծացնելով իրենց ինքնավարությունը:

Ի դեպ, անվտանգության նկատառումներով եւ քաղաքական տարաձայնությունների պատճառով ընտրություններ չեն անցկացվի 6 գավառում: Նախընտրական քարոզարշավի սկզբից արդեն 18 թեկնածու է սպանվել: