Շոյգուն կանխատեսել է Աֆղանստանում պատերազմի վերսկսում ՆԱՏՕ-ի ուժերի դուրսբերումից հետո

ՆԱՏՕ-ի ուժերի դուրսբերումից հետո, հավանաբար, քաղաքացիական պատերազմն Աֆղանստանում կվերսկսվի: Այս մասին հայտարարել է Ռուսաստանի պաշտպանության նախարար Սերգեյ Շոյգուն. հայտնում է «ՌԻԱ Նովոստի»-ն:

«Աֆղանստանում իրավիճակի զարգացումը պահանջում է ինչպես հարևան երկրների, այնպես էլ միջազգային կազմակերպությունների ուշադրությունը: Պետք է խոստովանել, որ երկրում Արևմտյան դաշինքի զգալի ռազմական խմբավորման ներկայության 20 տարվա ընթացքում այն չի կարողացել հասնել էական արդյունքների կայունացման և պետական կառավարման կայուն կառույցների ձևավորման գործում»,- ասել է Շոյգուն:

Նախարարի խոսքով՝ դաշինքի ուժերի դուրսբերումը և դրան հաջորդող քաղաքացիական պատերազմը կհանգեցնի բնակչության կյանքի հետագա վատթարացմանը, զանգվածային միգրացիային և ծայրահեղականության տարածմանը դեպի հարևան երկրներ: