Աֆղանստանը ահաբեկիչներին հանձնած ՆԱՏՕ-ի ղեկավարը կոչ է արել Չինաստանին և Ռուսաստանին՝ կանխել ահաբեկչության տարածումը Աֆղանստանում

ՆԱՏՕ-ի գլխավոր քարտուղար Իենս Ստոլտենբերգը հայտարարել է, որ ամբողջ միջազգային հանրությունը, ներառյալ՝ Ռուսաստանը և Չինաստանը, պետք է ջանքեր գործադրեն, որպեսզի թույլ չտան, որ Աֆղանստանը դառնա «գլոբալ ահաբեկչության ինկուբատոր»:

Ստոլտենբերգը Telegraph թերթում հրապարակած հոդվածում ասել է, որ Ռուսաստանը և Չինաստանը պետք է մասնակցեն Աֆղանստանում ահաբեկիչներին հակազդելուն երկրից օտարերկրյա զորախմբերի հեռանալուց հետո:

«Ես լիովին համաձայն եմ, որ ամբողջ միջազգային հանրությունը, ներառյալ՝ Ռուսաստանը և Չինաստանը, պետք է ջանքեր գործադրեն, որպեսզի Աֆղանստանը չդառնա այն վայրը, որտեղ ահաբեկչական խմբերը կարող են ազատ գործել, կազմակերպել, պլանավորել և ֆինանսավորել հարձակումները մեր երկրներում»,- ավելացրել է նա:

ՆԱՏՕ-ի գլխավոր քարտուղարի խոսքով՝ թալիբները Աֆղանստանում իշխանությունը վերցրին այն բանից հետո, երբ ՆԱՏՕ-ի դաշնակիցները որոշեցին ավարտել իրենց ռազմական առաքելությունը երկրում: Նա հավելել է, որ «խելամիտ կլիներ ակնկալել, որ նրանք կկարողանային ավելի երկար դիմակայել թալիբներին»՝ հաշվի առնելով, թե որքան միջոցներ են ներդրվել Աֆղանստանի անվտանգության ապահովման և տեղական բանակի ուսուցման համար: