Հայրիկյանի փաստաբանը դիտողություններ ունի` նախաքննության հետ կապված

ԱԻՄ առաջնորդ Պարույր Հայրիկյանի մահափորձի փաստով հարուցված քրեական գործի նախաքննությունն ավարտվել է: Այս մասին լրագրողների հետ հանդիպման ժամանակ հայտարարեց Հայրիկյանի փաստաբան Լևոն Բաղդասարյանը:

Նա նշեց, որ իրենք, նախաքննության հետ կապված, համապատասխան միջնորդություններ և դիտողություններ ունեն, որոնք կներկայացնեն դատաքննության փուլում:

Yerkir.am-ի հարցին` արդյո՞ք Հայրիկյանն ի վիճակի կլինի մասնակցել դատաքննությանը, փաստաբանը պատասխանեց. «Ճիշտ է, տևական բուժման կարիք կա, սակայն հույս ունենք, որ կապաքինվի և կմասնակցի դատաքննությանը»:

Փաստաբանի խոսքով նախաքննության ընթացքում առերեսում է եղել ձերբակալված երեք անձանցից մեկի և Հայրիկյանի  միջև, իսկ թե կոնկրետ ում, չնշեց: Նա ևս մեկ անգամ շեշտեց, որ դա մահափորձ էր, ոչ թե վախեցնելու փորձ: Հարցին, թե ինչո՞ւ պետք է ցանկանային սպանել Հայրիկյանին, պատասխանեց. «Նախագահի թեկնածուին ուզում էին սպանել, որպեսզի պետական հիմքերը խարխլեին»: