Հայրիկյանը դիմում է ՍԴ` ընտրությունները հետաձգելու պահանջով

ԱԻՄ առաջնորդ, ՀՀ ախագահի թեկնածու Պարույր Հայրիկյանն այսօր դիմելու է Սահմանադրական դատարան` ընտրությունները 15 օրով հետաձգելու պահանջով: Այս մասին Yerkir.am-ի հետ զրույցում ասաց Հայրիկյանի նախընտրական շտաբի աշխատանքները համակարգող Մանյա Այվազյանը:

Ըստ նրա՝ ՍԴ դիմելու մասին օրենքում նշված է, որ թեկնածուն ընտրությունների երկարաձգման ժամկետով կարող է դիմել դատարան` ընտրություններից 8 օր առաջ, որն այս դեպքում փետրվարի 10-ն է: «Բայց քանի որ փետրվարի 10-ը կիրակի է, մենք ստիպված այսօր ենք փորձում  դիմել ՍԴ` նշելով, որ դիմումը ուժի մեջ ընդունեն վերջնաժամկետով»,- ասաց նա:

Տիկին Այվազյանի հավաստմամբ՝ Հայրիկյանը, որպես նախագահի թեկնածու, ոչ լիարժեքորեն է կարողանում մասնակցել քարոզարշավի աշխատանքներին եւ նույնիսկ մտածում էր թեկնածությունը հանելու մասին: Սակայն, ինչպես նշում է Այվազյանը, իրենք եկան ընդհանուր եզրահանգման` օգտվել Սահմանադրությամբ ընձեռված` ընտրությունները հետաձգելու հնարավորությունից: