Եկեղեցուն արտոնություններ տալը` բացարձակ հիմարություն. Հրանտ Բագրատյան

Հայ Առաքելական եկեղեցուն` սեփականության եւ անհատույց մշտական օգտագործման իրավունքով տրված արհեստանոցները եւ դրանց զբաղեցրած հողատարածքները գույքահարկից եւ հողի հարկից ազատելը ՀԱԿ անդամ, տնտեսագետ Հրանտ Բագրատյանը որակեց «բացարձակ հիմարություն»:

Լրագրողների այն դիտարկմանը, որ Հովիկ Աբրահամյանը նշել է, թե եկեղեցուն այդ կերպ լավություն են անում` համայնքների հաշվին, Բագրատյանը վստահեցրեց, որ ԱԺ նախագահը վարչապետից ավելի լավ է հասկանում: «Հովիկ Աբրահամյանը շատերից ավելի լավն է, շատերից` ավելի վատը»,- նշեց Բագրատյանը:

ՀԱԿ անդամը թեեւ ընդունում է, որ եկեղեցուն պետք է առավելություններ տալ, բայց ոչ այդքան, որ դառնա մեծ առավելություններով տնտեսվարող սուբյեկտ: Ինչպես ասում են` ամեն ինչ չափի մեջ է գեղեցիկ:

«Արշակունիների ժամանակ էլ այդպես արեցին, որ պարտվեցինք»,- հավելեց Բագրատյանը:

Լրագրողներից մեկի այն դիտարկմանը, թե չի՞ վախենում, որ նման գնահատականների համար եկեղեցին նրան կբանադրի, Բագրատյանը պատասխանեց. «Մեկը լինի` իրենց բանադրի»: