Սթրոս Կանին ազատ են արձակել

Երեկ փակվել է Արժույթի միջազգային հիմնադրամի նախկին նախագահ Դոմինիկ Սթրոս Կանի դեմ բռնաբարության մեղադրանքով հարուցված սկանդալային դատական գործը: Դատավորները հայտարարել են, որ նա այսուհետ ազատ է, իսկ հյուրանոցի սպասուհու ցուցմունքներին չի կարելի հավատալ. տեղեկացնում է mignews.com-ը:

Դատավճռի հրապարակումից մի քնի րոպե անց Սթրոս Կանը եւ նրա կինը լքել են դատարանի շենքը: Նրանք հրաժարվել են խոսել լրագրողների հետ, սակայն գրավոր հայտարարություն են տարածել, որում ասվում է. «Այս երկուսուկես ամիսները մղձավանջ էին իմ ու ընտանիքիս համար: Ցանկանում եմ շնորհակալություն հայտնել Ֆրանսիայի եւ Միացյալ Նահանգների իմ բոլոր ընկերներին, ովքեր հավատում էին, որ ես անմեղ եմ, եւ այն հազարավոր մարդկանց, ովքեր ինձ անձամբ եւ գրավոր կերպով աջակցեցին: Ես խորապես շնորհակալ եմ կնոջս ու իմ ընտանիքին, որոնք ինձ հետ անցան այս փորձությունների միջով»:

Սթրոս Կանը դեռեւս 30 օր չի կարող լքել ԱՄՆ-ը, քանի որ սպասուհու փաստաբանները պատրաստվում են բողոքարկել դատարանի որոշումը:

Հիշեցնենք, որ Ֆրանսիայում նրան սպասում է հերթական դատավարությունը. ԱՄՀ նախկին նախագահին բռնաբարության մեջ է մեղադրում լրագրող Տրիստան Բանոնը: