Սթրոս-Կանի դեմ հարուցված գործը կարող է տապալվել

Արժույթի միջազգային հիմնադրամի նախկին ղեկավար Դոմինիկ Սթրոս-Կանի դեմ բռնաբարության փորձի մեղադրանքով ԱՄՆ-ում հարուցված գործը կարող է «տապալվել». գրում է New York Times-ը:

Վկայակոչելով հետաքննությանը մոտ կանգնած աղբյուրներ` թերթը նշում է, որ նյույորքյան հյուրանոցի սպասուհին, որը մեղադրել էր Սթրոս-Կանին իր դեմ ոտնձգությունների մեջ, իր մասին ոչ հավաստի տեղեկություններ է ներկայացրել: Դա կարող է կասկածի տակ դնել նաեւ գործի շրջանակներում նրա տված ցուցմունքները:

Այսօր ԱՄՀ նախկին ղեկավարը դարձյալ կկանգնի Նյու Յորքի դատարանի առաջ: Դատարանը հնարավոր է թեթեւացնի գրավի պայմանները, որի շնորհիվ ֆինանսիստն ազատ էր արձակվել բանտից:

62-ամյա Սթրոս-Կանը տնային կալանքի տակ է: Նա հերքում է իրեն ներկայացված բոլոր մեղադրանքները: