Նավթ ու գազ ենք փնտրելու

Կառավարությունը վաղվա նիստում հավանաբար որոշում կկայացնի ՀՀ էներգետիկայի եւ բնական պաաշարների նախարար Արմեն Մովսիսյանը ներկայացրած նախագծի վերաբերյալ, ըստ որի` Հայաստանում վերսկսվելու են նավթի եւ գազի պաշարների հետախուզման աշխատանքները:

Նախագծի համաձայն` Հայաստանի տարածքում նավթի եւ գազի հայտնաբերման նպատակով ուսումնասիրության լիցենզիաները տրամադրվելու են մրցութային կարգով, իսկ որոշման ուժի մեջ մտնելուց հետո մրցույթները կկազմակերպվեն 15-օրյա ժամկետում:

Հիշեցնենք, որ մեր երկրի տարածքում նմանատիպ աշխատանքներ իրականացվել են դեռեւս խորհրդային տարիներին, սակայն ապարդյուն: Նույն աշխատանքները վերսկսվեցին նաեւ անկախացումից հետո, արդյունքում` Արարատյան հարթավայրում հորատվեց ավելի քան 120 հորատանցք:

Ենթադրվում է, որ Արմավիրի մարզի Վանանդ գյուղի մոտակայքում կան գազի` մոտ 3 մլրդ խմ պաշարներ: Ամիսներ առաջ վանանդեցիները «Երկիր»-ի թղթակցի հետ զրույցում հայտնել էին, որ իրենք մասնակցել են համայնքում կատարված հորատման աշխատանքներին եւ համոզված են, որ ընդհատված աշխատանքները կվերսկսվեն: