Կուչմայի գործով հետաքննությունն ավարտվել է

Ուկրաինայի գլխավոր դատախազությունն ավարտել է լրագրող Գեորգի Գոնգաձեի սպանությանը նախկին նախագահ Լեոնիդ Կուչմայի մասնակցության գործով հետաքննությունը: Այդ մասին, ըստ ԻՏԱՌ-ՏԱՍՍ-ի, հայտնել է Գոնգաձեի ընտանիքի փաստաբանը:

Նրա խոսքերով` այսօր տուժած կողմին հրավիրել են դատախազություն` ծանոթանալու գործի վերաբերյալ փաստաթղթերին: Ընդ որում, ըստ փաստաբանի, դատախազության քննիչները համառորեն չեն ցանկանում հանցագործություն համարել մի շարք մարդկանց գործողություններ, ինչը վկայում է, որ «նրանք չեն ցանկանում բացահայտել ճշմարտությունը եւ գտնել պատվիրատուներին»:

Հիշեցնենք, որ մարտի 21-ին Ուկրաինայի գլխավոր դատախազությունը քրեական գործ էր հարուցել երկրի նախկին նախագահ Կուչմայի նկատմամբ` Գոնգաձեի սպանությանը մեղսակից լինելու մեղադրանքով: Մարտի 23-ից Կուչման ստորագրություն է տվել երկրից չբացակայելու մասին: