ՑԱԽԱԼ-ը հայտարարել է Գազայի հատվածում ՀԱՄԱՍ-ի ենթակառուցվածքներին հարվածելու մասին

Իսրայելի պաշտպանության բանակը (ՑԱԽԱԼ) հայտարարել է, որ հարվածել է Գազայի հատվածում պաղեստինյան ՀԱՄԱՍ շարժման ենթակառուցվածքներին։ «Արմենպրես»-ի փոխանցմամբ՝ այս մասին ասված է բանակի լրատվության ծառայության տարածած հաղորդագրությունում։

«Վերջին ժամերի ընթացքում, ի պատասխան երեկվա հրադադարի համաձայնության խախտման, որի ժամանակ թիրախավորվել էին ՑԱԽԱԼ-ի զինվորները, ՑԱԽԱԼ-ը գրոհել է Գազայի հատվածում ՀԱՄԱՍ-ի ենթակառուցվածքները»,- նշված է հաղորդագրությունում։

Իսրայելի պաշտպանության բանակն ընդգծել է, որ հարվածի թիրախ են դարձել ենթակառուցվածքները, որոնք ՀԱՄԱՍ-ն օգտագործում է զինամթերքի արտադրության և պահեստավորման համար։

«Հարվածները հասցվել են միջազգային իրավունքին համապատասխան և միայն այն բանից հետո, երբ հստակեցվել է, որ թիրախավորված ենթակառուցվածքների մոտակայքում չկան քաղաքացիական անձինք»,- հայտնել է ՑԱԽԱԼ-ը։