Իրանը խոստացել է պատասխանել Սիրիայի ուղղությամբ իսրայելական հարվածներին

Իսրայելը պատասխան կստանա Սիրիային հարվածներ հասցնելու համար. հայտարարել է Իրանի զինված ուժերի գլխավոր շտաբի պետ Մոհամադ Բաղերին:

«Սիոնիստները (Իսրայել) կարծում են, որ կարող են հարձակվել Սիրիայի վրա՝ առանց պատասխան ստանալու: Վերջին օրերի և ապագայի գործողությունները կվտանգեն Իսրայելի շահերը... Դիմադրության ճակատը կպատասխանի սիոնիստներին»,- ասել է Բաղերին լիբանանյան «Ալ Մայադին» հեռուստաալիքին տված հարցազրույցում:

«Իրանի զինված ուժերը պատրաստ են վճռական պատասխան տալ թշնամիների ցանկացած սպառնալիքի կամ գործողության»,- շեշտել է նա:

Սիրիական բանակի հրամանատարությունը հինգշաբթի գիշերը հայտնել է Իսրայելի կողմից հերթական հրթիռային հարվածի մասին Դամասկոսի մատույցներում, որի արդյունքում չորս սիրիացի զինվորներ վիրավորվել են: Իսրայելական բանակը պարզաբանել էր, որ Սիրիայի տարածքի վրա հարձակումը հրահրել է Նեգև անապատի միջուկային կենտրոնի մոտ հրթիռի արձակումը: