Դա պետական դիրքորոշում չէ, բայց նրանք ունեն դրա իրավունքը. Զախարովան՝ Ադրբեջան այցելած ռուս քաղաքագետների մասին

ՌԴ ԱԳՆ պաշտոնական ներկայացուցիչ  Մարիա Զախարովան, ով ամենամյա Жара երաժշտական փառատոնին ներկա լինելու նպատակով այցելել է Բաքու, Sputnik գործակալության ադրբեջանական ծառայության հետ զրույցում խոսել է ԼՂ հակամարտության մասին:

«Ռուսաստանը, ԼՂ հակամարտության կարգավորման հարցում և՛ միջնորդ հանդիսանալով, և՛ ինչպես Հայաստանի, այնպես էլ Ադրբեջանի բարեկամ երկիր լինելով, հետաքրքրված է հակամարտության կարգավորմամբ»,- ընդգծել է նա:

Զախարովան նաև անդրադարձել է մի խումբ ռուսաստանցի քաղաքագետների` վերջերս Ադրբեջան կատարած այցին, որի ժամանակ նրանք խոսել էին «Ադրբեջանի տարածքային ամբողջականության» մասին: Ըստ նրա` ժողովրդավարական հասարակություն ունեցող ցանկացած երկրում կան բազմաթիվ փորձագետներ և քաղաքական գործիչներ, դա պետական դիրքորոշում չէ, սակայն նրանք ունեն դրա իրավունքը, իսկ ՌԴ-ի դիրքորոշումն այդ հարցում անփոփոխ է: