Ռուսաստանի դեմ կիբերհարձակումն օգնել են կանգնեցնել հայ մասնագետները. ՌԴ ԱԴԾ ղեկավար

Ռուսաստանի Անվտանգության դաշնային ծառայության ղեկավար Ալեքսանդր Բորտնիկովը, ելույթ ունենալով հոկտեմբերի 4-ին Կրասնոդարում մեկնարկած` հատուկ ծառայությունների, անվտանգության մարմինների և իրավապահ մարմինների XVI միջազգային խորհրդակցության ժամանակ, պատմել է Ռուսաստանում WannaCry վիրուսի հարձակման հետևանքները նվազագույնին հասցնելու հարցում հայ մասնագետների աջակցության մասին. հայտնում է Русарминфо-ն:

«Հայաստանի գործընկերների հետ փոխգործակցությամբ հաջողվել է կանխել WannaCry-ի ներխուժումը մի շարք խոշոր բանկերի ցանց»,- ասել է Ալեքսանդր Բորտնիկովը:

Նրա խոսքով՝ երկու երկրների միջև փոխգործակցությունն օգնել է չեզոքացնել վիրուսի բացասական հետևանքները նաև ՀԱՊԿ այլ երկրներում:

WannaCry վիրուսի կիրառմամբ հաքերային հարձակումը սկսվել է 2017 թվականի մայիսի 12-ին: Դրանից տուժել է ավելի քան 200 հազար օգտատեր աշխարհի 150 երկրում: