Եվրախորհրդարանի պատգամավորը քննադատել է Բաքվին

Եվրախորհրդարանի գերմանացի պատգամավոր Վիոլա ֆոն Կրամոնը հանդես է եկել հայտարարությամբ, որում, ողջունելով Ադրբեջանի նախագահական ընտրություններին դիտորդական առաքելություն ուղարկելու` Եվրախորհրդարանի որոշումը, հույս է հայտնել, որ  Եվրախորհրդարանի առաքելությունը կնպաստի, որպեսզի ժողովրդավար ընդդիմությունը կարողանա մրցակցել ընտրություններում եւ դուրս չմղվի։

«Մենք քննադատում ենք Ադրբեջանի կառավարությանը՝ ընտրական գործընթացից ժողովրդավար ընդդիմության թեկնածու Ռուստամ Իբրահիմբեկովին դուրս թողնելու համար», - ասված է Վիոլա ֆոն Կրամոնի  հայտարարության մեջ:

Անհանգստացած Ադրբեջանում մարդու իրավունքների ոտնահարման իրավիճակից` պատգամավորը նշել է, որ իշխանություններն արգելում են ազատ եւ խաղաղ հանրահավաքները եւ հետապնդում են ընդդիմադիր քաղաքական ակտիվիստներին:

Հիշեցնենք, որ Ադրբեջանում նախագահական ընտրությունները նշանակված են հոկտեմբերի 9-ին: