Գլխների՛դ կպչի ձեր «ինքնիշխանությունը»․ Մելիքյան

Իրավապաշտպան Ռուբեն Մելիքյանն անդրադարձել է Սյունիք ադրբեջանցի զինծառայողի ներթափանցելու դեպքին՝ գրելով.

«Դավաճանությունն ու անկարողությունը «ինքնիշխանության» անվան տակ փաթեթավորելու վրա ռեժիմը ծախսում է ահռելի ռեսուրսներ։ Է՛լ ծախու «փորձագետներ», որ սնկի պես աճելով՝ ամեն սմարթֆոնից, հեռուստացույցից, սառնարանից ու արդուկից արդուկում են մեր գլուխները անտրամաբանական, բայց «փողկապավոր» բառակույտերով, է՛լ «պետական գաղափարախոսության» հռչակում, է՛լ պայքար նվիրական խորհրդանիշների դեմ …

Ու այդ մեծ կեղծիքը մեկ օրվա մեջ հօդս է ցնդում ադրբեջանցի ընդամենը մեկ զինծառայողի «ջանքերով»։

Հուսով եմ՝ մոլորեցված ու խաբված մեր եղբայրներից ու քույրերից շատերն այսօր կսթափվեն։

ՀԳ. Գլխների՛դ կպչի ձեր «ինքնիշխանությունը», հա՜…»։

Հիշեցնենք՝ այսօր հայտնի դարձավ, որ Սյունիքի մարզի Սիսիան խոշորացված համայնքի Շաքի բնակավայրում ադրբեջանցի է մտել և կրակել բնակիչներից մեկին։

Ավելի ուշ ԱԱԾ-ն հաստատեց տեղեկությունը՝ գրելով․ 

«Սեպտեմբերի 29-ին Ադրբեջանի Պետական անվտանգության ծառայությունը Հայաստանի Ազգային անվտանգության ծառայությանը տեղեկացրել է, որ Ադրբեջանի զորամասերից մեկի զինծառայողը անհայտ հանգամանքներում լքել է ծառայության վայրը։ 

Չի բացառվել, որ նա կարող էր ապօրինի հատած լինել Հայաստանի Հանրապետության սահմանը։ Դրանից հետո Հայաստանի և Ադրբեջանի իրավասու մարմիններն իրականացրել են համապատասխան որոնողական աշխատանքներ։

Հոկտեմբերի 1-ին՝ ժամը 14։15-ին, ՀՀ ՆԳՆ 112 օպերատիվ կառավարման կենտրոն ահազանգ է ստացվել, որ Սյունիքի մարզի Շաքի բնակավայրում կրակել են ՀՀ քաղաքացու ոտքին։

Դեպքի վայր են մեկնել ՆԳՆ ոստիկանության տարբեր ստորաբաժանումների օպերատիվ խմբեր։ Ձեռնարկվել են անհետաձգելի միջոցառումներ՝ դեպքի բոլոր հանգամանքները պարզելու ուղղությամբ։

Պարզվել է, որ հանցագործությունը կատարել է ադրբեջանցի զինծառայողը, որը ձերբակալվել է։  

Դեպքի մանրամասները ներկայացվել են նաև ադրբեջանական կողմին։

ՀՀ քննչական կոմիտեում դեպքի առնչությամբ նախաձեռնվել է քրեական վարույթ»։