Սիսիանի զորամասերից մեկում մահացած զինծառայողը 2 երեխա ունի, սպասում էին 3-րդին. «Սպուտնիկ»

Սիսիանի զորամասերից մեկում մահացած պայմանագրային զինծառայողը, «Sputnik Արմենիա»-ի տեղեկություններով, Հայկ Մովսիսյանն է։

Ավելի վաղ հայտնել էինք, որ ըստ մամուլի տեղեկությունների՝ Սիսիանի զորամասերից մեկում պայմանագրային զինծառայողի դի է հայտնաբերվել, նա ինքնասպանություն է գործել։ ՀՀ պաշտպանության նախարարությունը հաստատեց լուրը, որ 37-ամյա զինծառայող է մահացել ծառայության հետ առնչություն չունեցող պատճառներով։

Լրատվայանի տեղեկություններով` զինծառայող Հայկը և նրա կինը՝ Նարինեն, ունեն 2 երեխա, սպասում էին երրորդ զավակին։

Սիսիանցիները նրանց բնութագրում են որպես լավ, հայկական, ավանդական ընտանիք։ Հայկի մասին ասում են, որ նա շատ հավասարակշռված տղա է եղել, միշտ մասնակցել է պատարագների։

Նա վերջերս ծանր կորուստ է ունեցել՝ քաղցկեղից մահացել են նրա հայրն ու մայրը։

Sputnik Արմենիային հայտնել են, որ Սիսիանում խոսակցություններ կան, որ հնարավոր է` Հայկը շատ պարտքեր է ունեցել, բայց հստակ պատճառը դեռ ոչ ոք չգիտի։

Ինչ վերաբերում է զինծառայողի մահվան պատճառներին, ապա ըստ շրջանառվող խոսակցությունների` նա մահացել է ոչ թե զորամասից դուրս, այլ զորամասի ներսում` իր սենյակում ինքնասպան է եղել։