Գերմանիան և Ֆրանսիան Իրանին կոչ են արել վերադառնալ ԱՄՆ-ի հետ բանակցություններին

Գերմանիայի կանցլեր Ֆրիդրիխ Մերցը և Ֆրանսիայի նախագահ Էմանուել Մակրոնը համատեղ հայտարարությամբ կոչ են արել Իրանին թուլացնել լարվածությունը տարածաշրջանում և վերադառնալ ԱՄՆ-ի հետ բանակցություններին։ «Արմենպրես»-ի հաղորդմամբ՝ այս մասին հայտնում է Aljazeera-ն։Նշվում է, որ այս մասին ասված է պաշտպանության և անվտանգության խորհրդի երկկողմ նիստից հետո ընդունված հայտարարության մեջ։

«Մենք կոչ ենք անում Իրանին զերծ մնալ հետագա բանակցությունները ռազմական սրացումների կամ գործողությունների միջոցով վտանգելուց»,-ասվում է երկու երկրների հայտարարության մեջ։Առաջնորդները նաև ընդգծել են Հորմուզի նեղուցի շտապ վերաբացման անհրաժեշտությունը։Նրանք կոչ են արել Իրանին անհապաղ դադարեցնել հարձակումները տարածաշրջանում ԱՄՆ-ի և դաշնակիցների թիրախների վրա և վերադառնալ դիվանագիտությանը՝ զգուշացնելով, որ հետագա ռազմական էսկալացիան կվտանգի քաղաքական լուծումը։

Գերմանիան և Ֆրանսիան նաև վերահաստատել են իրենց ամուր աջակցությունը ԱՄՆ-ի և Իրանի միջև անցյալ ամիս կնքված փոխըմբռնման հուշագրին, որը միջնորդել էին Պակիստանը և Կատարը։ Նրանք նաև ընդգծել են Հորմուզի նեղուցը առանց վճարների կամ սահմանափակումների վերաբացելու անհրաժեշտությունը։

«Աջակցելով Հորմուզի նեղուցում Ֆրանսիայի և Մեծ Բրիտանիայի գլխավորած բազմազգ ռազմական առաքելությանը՝ Ֆրանսիան և Գերմանիան պատրաստ են նախապես տեղակայված միջոցներով մասնակցել, հենց որ պայմանները թույլ տան», -նշվում է հայտարարության մեջ։