Ալիևի այցը Վրաստան սպասվում է ադրբեջանցի լրագրողի արտաքսման ֆոնին

Vector News-ն իր ֆեյսբուքյան էջում գրում է․ «Ադրբեջանի նախագահ Իլհամ Ալիևը նախատեսում է այցելել Վրաստան։ Այս մասին հայտնում է Ռադիո Ազատությունը՝ հղում անելով իր աղբյուրներին։

Այս ֆոնին Թբիլիսիում արդեն նկատվում են հնարավոր այցին նախապատրաստության նշաններ․ օդանավակայանից դեպի քաղաք տանող կենտրոնական մայրուղու երկայնքով տեղադրված են Վրաստանի և Ադրբեջանի պետական դրոշները։ Սովորաբար նման միջոցառումներն իրականացվում են բարձր մակարդակի պաշտոնական այցերի նախօրեին։

Միաժամանակ Ռադիո Ազատությունը հայտնում է ադրբեջանցի լրագրող Աֆղան Սադիգովի ձերբակալման և հետագա արտաքսման մասին։ Վրաստանի ՆԳՆ-ի տվյալներով՝ նա վարչական կարգով ձերբակալվել է սոցիալական ցանցում ոստիկանության աշխատակցին վիրավորելու համար։

Հետագայում Թբիլիսիի քաղաքային դատարանը որոշում է կայացրել նրա արտաքսման վերաբերյալ․ դատավորը որոշումը հրապարակել է առավոտյան մոտ 04:00-ին, որից հետո Սադիգովը տեղափոխվել է Ադրբեջան։ Նրան նաև երեք տարով արգելվել է մուտքը Վրաստան։

Աֆղան Սադիգովը նախկինում արդեն պատասխանատվության էր ենթարկվել Ադրբեջանում և դատապարտվել էր շորթման հետ կապված մեղադրանքներով։ Ինքը լրագրողը և նրա կողմնակիցները պնդում են, որ գործը քաղաքական բնույթ է ունեցել։ Ազատվելուց հետո նա լքել է Ադրբեջանը և բնակվում էր Վրաստանում, որտեղ ակտիվ մասնակցում էր հակակառավարական ցույցերին և մի քանի անգամ ձերբակալվել էր։

Ադրբեջանը նախկինում դիմել էր նրա արտահանձնման պահանջով, սակայն Մարդու իրավունքների եվրոպական դատարանը կիրառել էր ժամանակավոր միջոցներ, որոնք սահմանափակում էին նրա արտահանձնումը։ Ի վերջո լրագրողի նկատմամբ կիրառվել է ոչ թե արտահանձնման, այլ արտաքսման ընթացակարգը՝ որպես Վրաստանի իշխանությունների վարչական որոշում։

Այս պահին որևէ պաշտոնական տեղեկություն չկա այն մասին, որ Աֆղան Սադիգովի արտաքսումը պայմանավորված է Իլհամ Ալիևի սպասվող այցի հետ»։