Ալեն Սիմոնյանը քարոզչություն է սկսել բուհերում, հերթականը Թոռնիկի բուհն էր

Երեկ ԱԺ նախագահի աթոռը զբաղեցնող Ալեն Սիմոնյանն այցելել է Հայաստանի ազգային ագրարային համալսարան և հանդիպել է ուսանողների հետ: 

Yerkir.am-ը տեղեկացավ, որ համալսարանի ռեկտոր Հրաչյա Զաքոյանն ու ՔՊ-ական ուսխորհրդի նախագահ, Ավետիք Չալաբյանի գործով հայտնի Թոռնիկը դժվարությամբ կարողացել են ապահովել 60-70 ուսանողի  մասնակցություն հանդիպմանը: 

Ընդ որում մասնակիցների մեծամասնությունը եղել են քոլեջի ուսանողներ, որովհետև վերջին տարիներին առկա բակալավրիատ ընդունվում են շատ քիչ թվով ուսանողներ: 

Զարմանալի է, որ Ավետիք Չալաբյանին 2000 ուսանող խոստացող Թոռնիկը բուհի շենքում իր կուսակցական շեֆի հետ հանդիպմանը գոնե չի կարողացել ապահովել 4000 ուսանողի ներկայություն:

Չենք մտաբերում նաև, որ Ալեն Սիմոնյանը, 2021 թ. լինելով ԱԺ նախագահ, հանդիպումներ իրականացներ բուհերում: 

Սիմոնյանը նոյեմբերի 6-ին այցելել էր Հայաստանում Եվրոպական համալսարան՝ հյուրընկալվելով նախկին պատգամավոր Հեղինե Բիշարյանին:

Կարծում ենք, որ առաջիկայում՝ ընտրություններից առաջ,  ականատես կլինենք  Սիմոնյանի այցերի նաև այլ բուհեր: 

Աժ նախագահն ու Ժաննա Շինարարը հավանաբար մոռացել են դասականի՝  2018 թ. իշխանափոխության օրերի պատգամը՝ բուհերը պետք է ապաքաղականացնել: