ՌԴ-ն ու ԱՄՆ-ն կարող են համատեղ աշխատել Արկտիկայում․ Պուտին

Ռուսաստանի նախագահ Վլադիմիր Պուտինը հայտարարել է Արկտիկայում ԱՄՆ-ի հետ համագործակցելու պատրաստակամության մասին՝ ընդգծելով, որ փոխգործակցությունը հնարավոր է նաև Ալյասկայում: Այս մասին նա ասել է Արևելյան տնտեսական ֆորումի լիագումար նիստի ժամանակ։

Ռուսաստանի ղեկավարի խոսքով՝ ԱՄՆ-ն զգալի ռեսուրսներ ունի Ալյասկայում, իսկ Ռուսաստանը՝ գազի արդյունահանման և հեղուկացման արդյունավետ տեխնոլոգիաներ, որոնք շատ առումներով գերազանցում են ամերիկյան ընկերությունների կողմից օգտագործվող տեխնոլոգիաները:

«Մենք լավ առաջարկ ունենք Ալյասկայում ամերիկյան ընկերությունների հետ աշխատելու համար։ Այնտեղ ռեսուրսներ կան, իսկ մենք ունենք տեխնոլոգիաներ, որոնք շատ ավելի արդյունավետ են, քան այն տեխնոլոգիաները, որոնց տիրապետում են մեր որոշ ամերիկացի գործընկերներ»,-ասել է նա։

Պուտինը հավելել է, որ ԱՄՆ-ում շատերն են պատրաստ վերսկսել կամ նոր աշխատանք սկսել ՌԴ-ի հետ: Եռակողմ ձևաչափով աշխատանքը քննարկվել է Չինաստանի հետ։

ՌԴ նախագահը նաև ընդգծել է, որ Մոսկվան պատրաստ է նման համագործակցության՝ համապատասխան քաղաքական որոշումների առկայության դեպքում:

«Մենք նույնպես պատրաստ ենք, բայց եթե այնտեղ քաղաքական որոշումներ լինեն, մենք պատրաստ ենք շարժվել նաև այդ ուղղությամբ»,-նշել է Պուտինը։