Խամենեիի ավագ խորհրդականը՝ Հայաստանի փոխարտգործնախարարին. Իրանը չի հանդուրժի իր անվտանգության դեմ ուղղված քայլեր

Իրանի գերագույն առաջնորդ այաթոլլահ Սեյեդ Ալի Խամենեիի ավագ խորհրդականը հանդիպել է Հայաստանի փոխարտգործնախարար Վահան Կոստանյանի հետ՝ ընդգծելու համար, որ Իրանը չի հանդուրժի իր անվտանգության դեմ ուղղված որևէ քայլ, հաղորդում է Mehr գործակալությունը։

Իրանի առաջնորդի միջազգային հարցերով խորհրդական Ալի Աքբար Վելայաթին չորեքշաբթի Թեհրանում հանդիպել և զրուցել է Իրանի հետ երկկողմ հարաբերությունները համակարգող Հայաստանի փոխարտգործնախարար Վահան Կոստանյանի հետ՝ վերջինիս խնդրանքով։

Հանդիպման սկզբում Կոստանյանը պարզաբանումներ է տվել և զեկուցել տարածաշրջանում վերջին զարգացումների և Վաշինգտոնում անցկացված բանակցությունների մասին՝ ընդգծելով երկու երկրների միջև պատմական հարաբերությունների և բարիդրացիության պահպանման անհրաժեշտությունը, գրում են իրանական լրատվամիջոցները։

«Մենք խորապես նվիրված ենք Իրանի հետ բարեկամական հարաբերություններին և գնահատում ենք այդ պատմական կապերը»,- հայտարարել է նա։

Վելայաթին, իր հերթին, ողջունել է երկկողմ համագործակցության ընդլայնումը: «Իրանի Իսլամական Հանրապետությունը միշտ ձգտել է իր հարևանների միջև երկարատև խաղաղության և անվտանգության և մեծ նշանակություն է տալիս Ադրբեջանի և Հայաստանի միջև խաղաղության հաստատմանը ավելի, քան որևէ այլ երկիր։ Իրանն առաջին երկիրն էր, որը քայլեր ձեռնարկեց Ադրբեջանի և Հայաստանի միջև խաղաղություն հաստատելու ուղղությամբ՝ Խորհրդային Միության փլուզումից և տարածաշրջանի երկրների անկախացումից հետո, և Արտաքին գործերի նախարարությունում իմ պաշտոնավարման ընթացքում ամեն ջանք գործադրել եմ այդ ուղղությամբ»,-նշել է Վելայաթին։

Խոսելով խաղաղության հասնելու Իրանի գործնական միջոցառումների մասին՝ Իրանի առաջնորդի խորհրդականը հավելել է. «Մենք նույնիսկ զոհաբերություններ ենք արել, ներառյալ՝ մի շարք իրանցի դիվանագետների ընտանիքների նահատակությունը, որոնք զոհվել են, երբ ղարաբաղյան պատերազմի ժամանակ հրթիռը հարվածել է նրանց ինքնաթիռին։ Այդ հաշվետվությունը ցույց է տալիս խաղաղություն հաստատելու հարցում Իրանի Իսլամական Հանրապետության լուրջ վճռականությունը»։

Նա շարունակել է պարզաբանել Իրանի Իսլամական Հանրապետության արտաքին քաղաքականության սկզբունքները՝ ընդգծելով, որ «տարածաշրջանի ճակատագիրը պետք է որոշեն բացառապես տարածաշրջանի երկրները»։