ԱԹՍ-ների գրոհների պատճառով «Պուլկովոյի» տասնյակ չվերթեր են հետաձգվել. «Զվարթնոցը» հայտնում է 3 չվերթի ուշացման մասին

Սանկտ Պետերբուրգի Պուլկովո օդանավակայանը զգուշացրել է ուղևորներին թռիչքների ժամանակացույցի հնարավոր փոփոխությունների և մեկնումների ուշացումների մասին՝ ինքնաթիռների ժամանման և մեկնման ժամանակավոր սահմանափակումների պատճառով: Այս մասին հայտնել է ավիակայանի մամուլի ծառայությունը:

«Օդանավերի ընդունման և բացթողման ժամանակավոր սահմանափակումների պատճառով, առաջիկա ժամերին հնարավոր են ժամանակացույցի փոփոխություններ», - նշել են մամուլի ծառայությունում։ Հաղորդագրությունը հրապարակվել է  Pulkovo Telegram ալիքում ։ 

Օդանավակայանի վարչակազմը խորհուրդ է տվել ուղևորներին ուշադիր հետևել «Պուլկովո» առցանց տախտակի տեղեկատվությանը, ինչպես նաև օգտագործել Telegram-ում օդանավակայանի պաշտոնական բոտը՝ չվերթների վիճակի վերաբերյալ արագ թարմացումներ ստանալու համար: Տրանսպորտային դատախազությունը հետևում է այն ուղևորների իրավունքների պահպանմանը, որոնց չվերթները հետաձգվել են:

Միևնույն ժամանակ, դատելով Երևանի «Զվարթնոց» միջազգային օդանավակայանի ցուցատախտակից, ուշանում են Սանկտ Պետերբուրգից ժամանող և մեկնող երեք չվերթեր։

Ավելի վաղ Պուլկովոյի օդանավակայանը ժամանակավորապես դադարեցրել էր ինքնաթիռների ընդունումն ու ուղարկումը ՝ ուկրաինական ուժերի կողմից անօդաչու թռչող սարքերի հարձակման հնարավոր սպառնալիքի պատճառով: Ինչպես նշել են Դաշնային օդային տրանսպորտի գործակալությունում, նման սահմանափակող միջոցառումների ներդրումը անհրաժեշտ քայլ է թռիչքների անվտանգությունն ապահովելու համար, քանի որ առաջնահերթությունը մնում է ուղևորների և անձնակազմի պաշտպանությունը: