Վերջին տարիներին մեր հասարակությունը ստացել է միայն պատերազմ, տարածքային կորուստներ, հազարավոր զոհեր և անորոշ ապագա․ Տիգրան Աբրահամյան

ԱԺ ամբիոնից ելույթ ունենալով՝ «Պատիվ ունեմ» խմբակցության քարտուղար Տիգրան Աբրահամյանը նախազգուշացրեց՝ Իրան-Իսրայել հակամարտությամբ պայմանավորված տարածաշրջանային էսկալացիան կարող է նոր հարվածներ հասցնել նաև այն երկրներին, որոնք չեն կարողանում ռիսկ կառավարել, այդ թվում՝ Հայաստանին։ Նա ընդգծեց, որ Հայաստանի իշխանությունն ի վիճակի չէ գնահատելու սպառնալիքների ազդեցությունը երկրի անվտանգության ու տնտեսության վրա։

Աբրահամյանի խոսքով՝ ներկայիս կառավարությունը չի կարող անհաղորդ մնալ տարածաշրջանում խորացող ճգնաժամից, որի պայմաններում Հարավային Կովկասում խախտվում է ռազմաքաղաքական բալանսը, Թուրքիան և Ադրբեջանը ստանում են նոր հնարավորություններ՝ աշխարհի ուշադրության կենտրոնում այլ օջախներ ունենալու պայմաններում։

Անդրադառնալով Հայաստան-Ադրբեջան բանակցություններին՝ նա մտահոգություն հայտնեց, որ պայմանավորվածությունները կնքվում են գաղտնի ու չեն հրապարակվում, ինչը վտանգավոր նախադեպ է։ Եզրափակելով խոսքը՝ Աբրահամյանը նշեց, որ վերջին տարիներին հասարակությունը լսել է ականջ շոյող խոստումներ, սակայն ստացել է պատերազմ, կորուստներ ու անորոշ ապագա։

Մանրամասն՝ տեսանյութում։