Մոռացված և անտեսված է «Էրեբունի» ամրոցը, ուրարտական պատը ցանկացած պահի կարող է փլուզվել․ Մանուկ Սուքիասյանի ահազանգը՝ «Էրեբունի» ամրոցից

«Մայր Հայաստան» դաշինքը կատարեց շրջայց Երևանի պատմամշակութային կարևորագույն հնավայրերում՝ «Կարմիր բլուրում», «Շենգավիթում» և «Էրեբունիում»՝ արձանագրելով բազմաթիվ խնդիրներ։ «Մայր Հայաստան» խմբակցության ղեկավար Մանուկ Սուքիասյանի խոսքով՝ «Էրեբունի» ամրոցը գտնվում է անմխիթար վիճակում․ տարածքն անխնամ է, բացակայում են ոռոգումը, ստվերոտ վայրերը, նստարանները, ինչպես նաև՝ տեսահսկման համակարգը և լիարժեք ցանկապատը։ Արձանագրվեց, որ թանգարանն ավելի քան մեկ տարի տնօրեն չունի, իսկ կառավարման ճգնաժամը բացասաբար է ազդում նաև «Կարմիր բլուրի» ու «Շենգավիթի» վիճակի վրա։

Նշվեց, որ ամրոցի տարածքում չկա անգամ խմելու ջուր, ինչը վտանգավոր է հատկապես զբոսաշրջիկների համար։ Կարծիք հնչեց, որ ուրարտական պատերի անտեսված վիճակը և դպրոցական ծրագրերից Ուրարտուի դուրս մղումը կարող են նպաստել ադրբեջանական պատմաքաղաքական շեշտադրումներին, որոնք փորձ են անում ժխտել Երևանի հնագույն ծագումը։

Դաշինքի ներկայացուցիչները մտահոգություն հայտնեցին նաև կադրերի արտահոսքի և թանգարանի մշտական ցուցադրության բացակայության վերաբերյալ՝ ընդգծելով, որ այս ամենը համապարփակ լուծում է պահանջում։

Մանրամասն՝ տեսանյութում։