Ժաննա Շինարարը դեռ չգիտի ՀՀ բուհերի ճշգրիտ անվանումները

Ամիսներ առաջ ԱԺ պագամավոր Արթուր Խաչատրյանը ԿԳՄՍ նախարար Ժաննա Անդրեասյանին հարցրել էր, թե քանի՞ տարի է Գյուղինստիտուտ ուսանող չի մտնում․ ի՞նչ եք մտածում Գյուղինստիտուտի գրավչությունը բարձրացնելու համար: 

Ի պատասխան՝ Ժաննա Անդրեասյանը նախատել էր, որ բուհն ունի այլ անվանում՝ Ագրարային համալսարան, սակայն այդպես էլ բովանդակային պատասխան չէր տվել, թե պետական մակարդակով ինչ է արվելու՝ Ագրարային համալսարանի գրավչությունը բարձրացնելու համար։ 

Անցած շաբաթ Նիկոլ Փաշինյանի մոտ քննարկվել էր Սննդամթերքի անվտանգության համակարգի զարգացման ռազմավարությունը: 

Yerkir.am-ը պարզեց, որ այս կարևոր փաստաթղթում, որն ընդունվել է 2023 թ. մարտին, Հայաստանի ազգային ագրարային համալսարանը ներկայացված է որպես Հայաստանի ՊԵՏԱԿԱՆ ագրարային համալսարան:

Զավեշտն այն է, որ սույն ռազմավարության նախագիծը մինչև կառավարության նիստում հաստատվելը, քննարկվել է կրթության ոլորտի լիազոր մարմնում` տիկին Ժաննայի ղեկավարած նախարարությունում:

Մեզ մնում է  միայն տիկին Ժաննային իրազեկել, որ 2012 թվականից ՀՀ-ում ՀԱՅԱՍՏԱՆԻ ՊԵՏԱԿԱՆ ԱԳՐԱՐԱՅԻՆ ՀԱՄԱԼՍԱՐԱՆ անվանումով բուհ ուղղակի գոյություն չունի: Այն 2012թ. վերանվանվել է Հայաստանի ազգային ագրարային համալսարանի: