Ռուսական զորքը վերահսկողության տակ է վերցրել Պետրոպավլովկա և Վրեմևկա բնակավայրերը. ՊՆ

Ռուսական զորքը վերահսկողության տակ է վերցրել ԴԺՀ-ի Պետրոպավլովկա և Վրեմևկա բնակավայրերը։ Այս մասին հայտնում է ՌԴ պաշտպանության նախարարությունը։

«Հաջող հարձակողական գործողությունների արդյունքում «Կենտրոն» զորախմբավորման ստորաբաժանումներն ազատագրել են Դոնեցկի Ժողովրդական Հանրապետության Պետրոպավլովկա բնակավայրը», - ասված է հաղորդագրության մեջ:

«Արևելք» զորախմբավորման ստորաբաժանումներն էլ շարունակել են առաջխաղացումը դեպի Ուկրաինայի զինված ուժերի պաշտպանության խորքեր:

««Արևելք» զորախմբավորման ստորաբաժանումներն ազատագրել են Դոնեցկի Ժողովրդական Հանրապետության Վրեմևկա բնակավայրը», - հայտարարել են նախարարությունում:

Գերատեսչությունը հավելել է, որ ԴԺՀ-ի Կոստանտինոպոլ և Վելիկայա Նովոսելկա բնակավայրերի շրջաններում հարված է հասցվել Ուկրաինայի զինված ուժերի մեքենայացված և դեսանտագրոհային բրիգադներին:

«Ուկրաինայի զինված ուժերի կորուստները կազմել են մինչև 135 զինծառայող, 2 մարտական զրահապատ մեքենա, 3 ավտոմեքենա և արտասահմանյան արտադրության դաշտային հրետանու 5 հրանոթ: Ոչնչացվել է զինամթերքի պահեստ», - ասվում է ամփոփագրում։

Հիշեցնենք՝ 2022 թվականի փետրվարի 24-ին սկսվեց Ռուսաստանի և Ուկրաինայի միջև զինված հակամարտություն՝ Ռուսաստանի զինված ուժերի կողմից Ուկրաինայի տարածք ներխուժմամբ։ Մոսկվայի ժամանակով մոտավորապես ժամը 05:30-ին Ռուսաստանի նախագահ Վլադիմիր Պուտինը հայտարարեց Ուկրաինայի «ապառազմականացման և դենացիֆիկացման հատուկ գործողության» մասին, որից րոպեներ անց հրթիռային հարվածներ սկսվեցին Ուկրաինայի տարբեր վայրերում։ Մարտական գործողություններն ընթանում են մինչ օրս։