Լավրովը մեկնաբանել է Թուրքիայի և Ուկրաինայի ռազմատեխնիկական համագործակցությունը

Թուրքիայի և Ուկրաինայի միջև ռազմատեխնիկական համագործակցությունը տարակուսելի է՝ հաշվի առնելով ուկրաինական հակամարտությունում միջնորդելու Անկարայի ցանկությունը, թուրքական Hurriyet թերթին տված հարցազրույցում ասել է Ռուսաստանի արտգործնախարար Սերգեյ Լավրովը։

«Ցավոք, Անկարան շարունակում է համագործակցել Կիևի ռեժիմի հետ ռազմատեխնիկական ոլորտում։ Թուրքական զենքն օգտագործվում է Ուկրաինայի զինված ուժերի կողմից ռուս զինվորականների և խաղաղ բնակիչների սպանության համար։ Սա չի կարող տարակուսանք չառաջացնել՝ հաշվի առնելով թուրքական ղեկավարության հայտարարությունները միջնորդական ծառայություններ մատուցելու պատրաստակամության մասին»,- ասել է նա։

Լավրովն ընդգծել է, որ Ռուսաստանը բարձր է գնահատում ուկրաինական ճգնաժամի կարգավորմանն ուղղված Անկարայի ջանքերը։ Նա հիշեցրել է, որ հենց Թուրքիան է հարթակ տրամադրել 2022 թվականի գարնանը Ստամբուլում բանակցությունների համար, իսկ հետո նպաստել հացահատիկի գործարքի կնքմանը։