Վաշինգտոնում կարծում են, որ Հարավային Կովկասում իրավիճակի կարգավորումը ռազմական լուծում չունի

ԱՄՆ-ում վստահ են, որ Հարավային Կովկասում իրավիճակի կարգավորումը ռազմական լուծում չունի, և առաջ գնալու ճանապարհը Հայաստանի և Ադրբեջանի միջև ուղիղ երկխոսությունն է: Այս մասին հայտնել է ԱՄՆ պետքարտուղարության խոսնակի առաջին տեղակալ Վեդանտ Պատելը:

Նա նշել է, որ Վաշինգտոնում շատ ուրախ են հյուրընկալել Հայաստանի և Ադրբեջանի արտգործնախարարներին կարևոր քննարկումների համար:

Ինչ վերաբերում է Արարատ Միրզոյանի և Ջեյհուն Բայրամովի միջև տեղի ունեցող բանակցություններին, Պատելը նշել է, որ չի կարող մեկնաբանություններ անել շարունակվող գործընթացի առնչությամբ:
«Ես նորից կկրկնեմ, որ մենք հավատարիմ ենք մնում Հարավային Կովկասի տարածաշրջանի խաղաղ ապագան խթանելուն: Մենք կարծում ենք, որ ուղիղ երկխոսությունն առանցքային է տևական խաղաղության հասնելու համար, և գտնում ենք, որ դա հնարավոր է այս երկու երկրների միջև», - ասել է դիվանագետը։ 

Նա հիշեցրել է, որ ԱՄՆ պետքարտուղար Էնթոնի Բլինքենը, Հարավային Կովկասում բանակցությունների հարցերով ԱՄՆ պետքարտուղարության ավագ խորհրդական Լուիս Բոնոն խորապես ներգրավված են այս գործընթացում: