Մարիուպոլն այլևս գոյություն չունի. Կուլեբա

Ռուսական զորքերի կողմից յոթ շաբաթ տևած պաշարումից հետո Մարիուպոլում վիճակը ծանր է. Ազովի ծովի ափին երբեմնի ծաղկող քաղաքն «այլևս գոյություն չունի»․ հայտարարել է Ուկրաինայի արտաքին գործերի նախարար Դմիտրի Կուլեբան CBS Face the Nation հաղորդաշարի եթերում։

«Ուկրաինական բանակի մնացորդները և խաղաղ բնակչության մի մեծ խումբ իրականում շրջապատված են ռուսական զորքերով։ Նրանք շարունակում են իրենց կռիվը, բայց, դատելով նրանից, թե ինչպես է ռուսական բանակն իրեն պահում Մարիուպոլում, նրանք որոշել են ամեն գնով հողին հավասարեցնել քաղաքը»,- ասել է նախարարը։

Նա հավելել է, որ իրավիճակը շրջափակված Մարիուպոլում կարող է «կարմիր գիծ» դառնալ Ռուսաստանի Դաշնության հետ բանակցություններում։

«Բուչայից հետո հատկապես դժվարացավ շարունակել շփումը ռուսական կողմի հետ։ Սակայն, ինչպես նախագահն է ասել, Մարիուպոլը կարող է լինել «կարմիր գիծ»,- ասել է Կուլեբան: