Ռուսաստանը ևս 7000 զինվոր է տեղակայել Ուկրաինայի հետ սահմանին. ԱՄՆ

Ուկրաինայի հետ սահմանից ռուսական զորքերի մի մասի դուրսբերման մասին Մոսկվայի հայտարարությունները չեն համապատասխանում իրականությանը. վերջին օրերին Ռուսաստանը սահմանին տեղակայել է ևս 7000 զինծառայող։ Այս մասին լրատվամիջոցներին տեսակոնֆերանսի միջոցով հայտնել են ԱՄՆ պաշտոնյաները, որոնք ցանկացել են անհայտ մնալ։

Պաշտոնյաներից մեկը նշել է, որ ՌԴ նախագահ Վլադիմիր Պուտինը, ի հեճուկս երկխոսության՝ բաց լինելու մասին հայտարարություններին, պատրաստվում է պատերազմի։ Ըստ նրա՝ ռուս պաշտոնյաները հրապարակայնորեն հայտարարել են բանակցելու և լարվածությունը նվազեցնելու պատրաստակամության մասին, բայց, միևնույն ժամանակ, գաղտնի պատրաստվում են պատերազմի։

ԱՄՆ պետքարտուղար Էնթոնի Բլինկքենը նախօրեին ասել էր, որ Վաշինգտոնըչի կարող հաստատել այն տեղեկությունը, որ Ռուսաստանը զորքերը դուրս է բերում սահմանից։

Իսկ ԱՄՆ նախագահ Ջո Բայդենը հայտարարել էրց Ուկրաինայի հետ սահմանին մոտ 150 հազար ռուս զինվորականների կենտրոնացման մասին։