ԱՄՆ-ը սկսել է զորք տեղակայել թուրք-սիրիական սահմանին

Թուրք-սիրիական սահմանին թուրքական զինուժի և Քուրդիստանի բանվորական կուսակցության (ՔԲԿ-PKK) սիրիական թևի՝ YPG-ի միջև ծավալված մարտերից անմիջապես հետո Միացյալ Նահանգները զրահամեքենաներ և կենդանի ուժ է ուղարկել Թուրքիային սահմանակից Սիրիայի հյուսիսային շրջաններ. տեղեկացնում է Ermenihaber-ը:

Այս մասին տեղեկացնող թուրքական Hurriyet պարբերականի կայքը նշում է, որ ամերիկյան զինուժի ստորաբաժանումները նպատակ ունեն կանխել թուրք-քրդական ուժերի հնարավոր ու հերթական բախումը: Ամերիկյան ուժերի տեղակայումից հետո թուրքական բանակը նոր ուժեր է կուտակել Սիրիայի հետ սահմանին:

YPG-ի աղբյուրները հայտնում են, որ ԱՄՆ-ը զրահամեքենաներ է սկսել կենտրոնացնել Քոբանիից մինչև Քամիշլի հատվածի երկայնքով ու թուրքական կողմին նախազգուշացրել, որ եթե դարձյալ հարձակողական գործողությունների դիմի, ապա ամերիկյան ուժերը կդադարեցնեն Ռաքքայի օպերացիան և կտեղակայվեն թուրք-սիրիական սահմանին: