Փաշինյանին Իտալիայում հարց ուղղած «լրագրողը» դատապարտվել է 7 տարվա ազատազրկման

Այսօր Բաքվի ծանր հանցագործությունների դատարանը ընթերցել է շորթման մեջ մեղադրվող Աթա Աբդուլաևի դատավճիռը։ Նա դատապարտվել է 7 տարվա ազատազրկման։

Աբդուլաևը նշել է, որ համաձայն չէ իրեն առաջադրված մեղադրանքի հետ և խնդրել է արդարացում։

Հիշեցնենք, որ Աբդուլաևն այն ադրբեջանցին է, որը 2019 թ. նոյեմբերին «ներխուժել» էր Միլանի Հայ առաքելական Սուրբ Քառասուն Մանկունք եկեղեցի, որտեղ ելույթ էր ունենում Իտալիայում գտնվող Նիկոլ Փաշինյանը: Նա ներկայացել էր որպես բլոգեր և ցանկացել էր հարց ուղղել ՀՀ վարչապետին, ինչը նրան թույլատրվել էր: Աբդուլաևը պահանջել էր Փաշինյանից «դուրս բերել հայկական զորքերը Լեռնային Ղարաբաղից» և մեղադրել էր հայերին «ցեղասպանություն» կատարելու մեջ:

Սոցցանցերի հայ օգտատերերին շատ արագ հաջողվեց պարզել, որ «բլոգերն» իրականում կապված է ադրբեջանական հատուկ ծառայությունների հետ և հարում է մերձալիևյան շրջանակներին: