Շառլ Միշելը Հայաստանին և Ադրբեջանին երկխոսության կոչ է արել

Հայաստանի և Ադրբեջանի միջև քաղաքական երկխոսությունը կարող է հանգեցնել կայուն կարգավորման. հայտարարել է Եվրոպական խորհրդի նախագահ Շառլ Միշելը Արևելյան գործընկերության քաղաքացիական հասարակության ֆորումում ելույթ ունենալիս։

«Տարածաշրջանում ձգձգվող հակամարտությունները մնում են հիմնարար խնդիր։ Դրանք պահանջում են նոր ջանքեր՝ միջազգային իրավունքի սկզբունքներին և նորմերին համապատասխան։ ԵՄ-ն պատրաստ է խաղալ իր դերը հակամարտությունների կանխարգելման և կարգավորման գործում։ Սա ներառում է վստահության ձևավորում և կայուն ու համապարփակ կարգավորման խթանում, ներառյալ՝ հետկոնֆլիկտային վերակառուցման միջոցառումներին աջակցությունը:

Հայաստանի և Ադրբեջանի հարաբերությունները ցույց են տալիս իրավիճակի փխրունությունը. ես լիովին համոզված եմ, որ միայն քաղաքական երկխոսությունը կարող է հանգեցնել կայուն կարգավորման։ Դա նաև կպահանջի Հայաստանում և Ադրբեջանում քաղաքացիական հասարակության համախմբում, կամուրջներ կառուցելու և հաշտեցման ջանքերի օժանդակություն», - նշել է նա: