Ռուսաստանն ու Ադրբեջանը հաստատել են 2022 թվականի սահմանագծման աշխատանքային պլանը

Ռուսաստանն ու Ադրբեջանը հաստատել են 2022 թվականի պետական սահմանի սահմանազատման հանձնաժողովի աշխատանքային պլանը. հայտնել են ՌԴ ԱԳՆ-ից։

Անցած շաբաթ Պյատիգորսկում կայացել է ռուս-ադրբեջանական սահմանազատման համատեղ հանձնաժողովի տասներորդ նիստը։

«Քննարկվել են Ռուսաստանի Դաշնության և Ադրբեջանի Հանրապետության միջև պետական սահմանի սահմանազատման գործընթացի շարունակման հետ կապված հարցեր, հաստատվել է հանձնաժողովի՝ 2022 թվականի աշխատանքային ծրագիրը»,- ասվում է ՌԴ ԱԳՆ հաղորդագրության մեջ։

Հանդիպման կողմերը հայտարարել են, որ ռուս-ադրբեջանական սահմանագծման համատեղ հանձնաժողովի՝ 2021 թվականի աշխատանքային պլանն ամբողջությամբ իրականացվել է։

Հանձնաժողովի հաջորդ նիստը նախատեսվում է անցկացնել Ադրբեջանի Հանրապետության տարածքում։ «Հանդիպման ժամկետները կհամաձայնեցվեն դիվանագիտական ուղիներով»,- հայտնել են ՌԴ ԱԳՆ-ից։