Թուրքիայի ընդդիմությունը չի առաջադրի նախկին նախագահ Աբդուլլահ Գյուլին՝ որպես միասնական թեկնածու

Թուրքիայի հիմնական ընդդիմադիր Հանրապետական-ժողովրդական կուսակցությունը (CHP) և «Լավ» կուսակցությունը առաջիկա ընտրություններում չեն միավորվի ի պաշտպանություն նախկին նախագահ Աբդուլլահ Գյուլի՝ ընդդեմ նախագահ Ռեջեփ Թայիփ Էրդողանի. գրում է լրագրող Հանդե Ֆըրաթը:

Ֆըրաթը բարձր է գնահատել CHP-ի նախագահ Քեմալ Քըլըչդարօղլուի և «Լավ» կուսակցության առաջնորդ Մերալ Աքշեների վերջին հանդիպումը, որը տեղի է ունեցել սեպտեմբերի 5-ին Ստամբուլում. հաղորդում է GazeteDuvar-ը:

Սյունակագիրը մեջբերում է կուսակցության պաշտոնյաների խոսքերը, որ երկու առաջնորդները հետագայում կքննարկեն, թե ում կարող են առաջադրել Էրդողանի դեմ նախագահական ընտրություններում:

«Կուսակցության ներկայացուցիչներն ասել են, որ առաջնորդները խորհրդակցությունների ընթացքում կքննարկեն տարբերակներ՝ շեշտելով, որ Աբդուլլահ Գյուլի անունը օրակարգում չկա»,- գրել է Ֆըրաթը:

Պաշտոնյաները լրագրողին ասել են նաև, որ երկու կողմերն էլ մտադիր են շարունակել համագործակցությունը «փոխադարձ հարցերի» շուրջ, սակայն շեշտել են, որ CHP-ն և «Լավ»-ը միմյանցից անկախ որոշումներ կկայացնեն այլ հարցերի վերաբերյալ:

Հիշեցնենք, որ CHP-ն Թուրքիայի ամենահին կուսակցությունն է՝ հիմնված Աթաթուրքի կողմից, այն համարվում է Էրդողանի գլխավոր հակառակորդ ուժը։